Dama a drumi djasabra anochi den angustia di morto

E la bai entregá denunsia sin ku a detené e sospechoso:

10267
WILLEMSTAD—Den fin di siman a surgi un situashon den kua un hòmber maltratá un muhé ku ta mama di un yu di apénas 4 aña.

E maltrato ta di tal indolé ku e la bai para te na dòkter ku doló di lomba.  Djasabra mes el a bai entregá keho na warda di Rio Canario, pero nan no a tuma su denunsia indikando na dje ku e tabatin ku regresá siguiente dia mainta entre 8:00 or pa 12:00 or. Momentu ku e la entregá  su keho e la mustra e polis e kaminda ku su lomba tabata hinchá, pero ni asina e no a tuma urgensia ya ku e la pidi e denunsiante pa e la regresá siguiente dia.   Esaki a pone ku e mama a disidí na subi Facebook i indiká ku si algu pas’e, esta ku si e lanta morto,  ta ken ta esun ku lo a kometé esaki. E la indiká den direkshon di esnan kende a kometé e akto pa asina un i tur por ta na altura ta ken lo a kometé e krímen. Hinter e asuntu aki a hala masha atenshon mes, paso hopi a kuminsá teme pa bida dje mama aki. Redakshon di Vigilante tabatin kontakto ku e mama. E la konfirmá nos e loke nos a relatá.

E la mustra Vigilante e karta di dòkter ku ta raportá e konsekuensia dje maltrato ku a tuma lugá. Ta asina ku na momentu ku e el a regresá Warda di Rio Canario ayera pa entregá keho, nèt e la topa su agresor ta sali. Ora ku e la drenta paden pa entregá su keho nan a indiké ku e tin di pasa awe djaluna mainta pa firma su denunsia komo ku e man di esun ku a atendé tabata yen di trabou. OM a tuma nota di lokual ta pasando i mester bisa ku mesora nan a drenta den akshon. OM den estrecho koperashon ku Asistensha di Víktima a tene kontakto ku e mama ayera. Ta asina ku ayera nochi e mama a sinta ku e sentro pa Asistensha di Víktima i splika detayadamente tur lokual ku a tuma lugá. For di loke sali den e kombersashon ku e mama, fiskal Dannaoui lo sigui atendé ku e eksperensia amargo ku víktima a pasa aden, Pa lokual ta trata e parti aki Sra Martina kende ta bosero di OM a konfirmá na nos e prosedura.