Doña Mistica Stefania ta kanta den e Jump In di Haké

122
E tambe ta presentá den e Jump In di Haké.  

WILLEMSTAD,—-E aña aki lo bai tin dos dia di ambiente di e Jump In di Haké, e dos dia nan lo bai ta 14 i 15 di febrüari. E sitio lo bai ta mes un kos ku esun di aña pasa, pues e dos Jump In nan di Haké ta bai tuma lugá den Curaçao Festival Center.

Di informashon ku a drenta na mesa di redakshon di ‘E Mulina’, ta bisa ku e legendario kantante den ámbito di Tambú ku ta Doña Mistica Stefania lo bai ta presentá den e popular Jump In ariba menshoná, nos a keda pone na altura ku e ta bai kanta e Tumba ku a hasié asina popular na aña 1989 ku ta “Den mes un wea”.

Mester bisa ku Doña Mistica Stefania ta e úniko hende muhé ku tin un promé finalista riba su nòmber, esaki a sosodé na aña 1989. Si Boy Dap no a partisipá na aña 1989 sin duda Mistica Stefania lo a bira e promé Reina di Tumba di Kòrsou.

‘E Mulina’, a haña lus kòrá pa no menshoná riba kua di e dos dia nan Doña Mistica Stefania ta bai presentá den e Jump In di Haké. Loke si ta 100% konfirmá ta e echo ku pa promé biaha den historia Doña Mistica Stefania ta bai presentá den un Jump In i e lo bai kanta su Tumba ku a hasié super popular den nos farándula. Loke si no ta konosé ainda serka di ‘E Mulina’, ta ku kua banda Doña Mistica Stefania ta bai presentá kuné.