Ekipo di tènis U-14 maskulino den ‘World Junior Team Competition’

75
WILLEMSTAD—Durante di e fin di siman ku ta tras di lomba, e ekipo maskulino di tènis for di Kòrsou, formá pa hóben tenistanan bou di 14 aña di edat, a sali pa Repúblika Dominikana.

E biahe aki, ta pa partisipá na e promé buèlta di ‘World Junior Team Competition’ (WJTC) . E ekipo aki, ku lo representá Kòrsou na e torneo mundial, pa hungadónan di U-14, ta konta ku tenistanan Ricardo Winkel, Zahyd Josephia i Giovanni Jansen, kende nan ta kompañá pa coach Jori Meulenbeld.

Na e evento di kualifikashon, ku a konosé su apertura ayera, lo inisiá ku weganan awe djaluna dia 13 yanüari 2020 i lo hunga te ku dia 17 yanüari próksimo. Ta trata di evento, ku lo konta ku partisipashon di un total di 14 pais den region di COTECC (region di Karibe i Sentro Amérika).

E ganadó di e torneo lo posishoná su mes pa e siguiente buèlta, unda nan lo bai kompetí kontra di entre otro Canada, Mexico i Estadonan Uni, pa asina lucha pa e dos puestonan den e final mundial.

Kada kompetensia di pais lo konsistí di dos wega individual i unu dòbel.

Kòrsou ta forma parti di grupo, huntu ku Hondúras i Sürnam. Awe e ekipo lokal lo hunga su promé wega, enfretando Sürnam, Miéntras ku mañan djamars dia 14 yanüari 2020, Kòrsou lo topa Hondúras.

Deporte Vigilante tambe ta uni na e deseonan di tur klase di éksito ku e gran reto aki.