Fiesta di gol djasabra den promé divishon FFK

171
Momentu ku Geryon Alberto ta anotá un di e 9 golnan di Centro Dominguitu.
WILLEMSTAD—E kampionato di futbòl FFK, pa loke ta promé divishon su temporada 2019/2020 a sigui durante di e fin di siman ku ta tras di lomba. Un ke otro na momentu ku tabatin 4 partido ku a mira akshon.

Primeramente tabata djasabra ku tabatin 2 wega den Stadion Ergilio Hato. Esakinan a konvertí e anochi, den un berdadero fiesta di gol. Un ke otro unda ku tabatin un kantidat di 15 gol, ku a keda anotá den e 2 weganan aki. E resultadonan tabata di e siguiente manera:

Centro Dominguitu – SUBT 9-0

Den e promé wega di anochi, tabata Centro Dominguitu, dirigí pa Yacir Hyman, ku ta golia e barika helnan di Kintjan, S.U.B.T., ku ta bou di direkshon tékniko di Kenneth Maria, sin kompashon, ku skor di 9-0. Esaki despues ku na sosiegu nan tabata den bentaha di 4-0.

Tabata Dominguitu su promé triunfo di temporada despues ku nan tabatin únikamente 1 empate i 5 derota. Miéntras ku S.U.B.T. a sufri nan di 6 derota konsekutivo, despues di a logra triunfo den nan promé wega di temporada. Ku e resultado aki Dominguitu ta sali for di sotano i laga nan tras Hubentut Fortuna i S.U.B.T., ku e ekipo di Kintjan awor na último posishon.

Rendell Winklaar ku hattrick, unda Ashar Bernardus i Shurendric Fransinet kada unu na 2 okashon, huntu ku Shurwendell Roosje i Geryon Albertus tabata esnan kende a sòru pa e 9 golnan den e partido, ku a keda dirigí pa rèfri Edsel Dimie.

Inter/Willemstad – Hubentut Fortuna 5-1

Seguidamente tabata e ekipo di Inter/Willemstad ku ta golia e muchanan di Hubentut Fortuna/Kurá Piedra ku skor di 5-1. Tabata partido ku rèfri Arthur Gosepa a dirigí, ku a sosegá ku Inter/Willemstad den bentaha di 2-0.

Gersinho Constansia tabatin un hattrick, miéntras ku Runiangelo Rosalia i Davidson Rosa tabata e otro dosnan ku a anotá, pa e ekipo ganadó, unda ku Luis Fruto Miranda a salba honor pa e ekipo di ‘Seru/Kurá Piedra’.