Fiskal Angela lo prosesá kontra violadó di menor

572
Mr. Angela lo bai pidi kastigu pa e akusado den korte apelashon.
WILLEMSTAD,— E hòmber Raul J. kende a keda kondená na 7 aña  prizòn den korte di promé instansia, pa akto inmoral kontra 2 menor di edat a apelá su sentensia unda awor lo e para dilanti 3 wes. Esaki despues ku wes di promé instansia a haña ta probá ku e akusado lo a kometé akto inmoral kontra di e 2 menornan, unda Ministerio Públiko a pidi 8 aña di prizòn pe kual wes a baha esaki i konden’é na 7 aña.

Ta trata aki di un akusado ku lo a kometé akto inmoral ku un menor for di tempu e tabatin 7 aña, kual e la hasi esaki pa 5 aña, esta te na momentu ku e víktima a hasi 12 aña. E kaso ta unu basta grave mirando ku e akusado lo tabata kometé aktonan basta serio kontra di e menor inkluyendo penetrashon. Tambe e akusado Raul lo tabata mishi ku vários parti di kurpa di e víktima, kual e la asta sunchi e menor.

Algu ku sigur a hala atenshon durante e kaso ta e echo ku e akusado lo tabata bisa e víktima menor ku e mester hasi algu kuné promé ku e kumpra pan i buki pa bai skol . E akusado lo tabata bai buska e menor na su kas, na momentu ku su mama no tei. Durante e kaso den promé instansia a bin dilanti ku e akusado lo tabatin relashon amoroso ku mama di e promé víktima, esta e menor ku el a kuminsá abuzá di dje na momentu ku e tabatin 7 aña.

Ta trata aki di algun echo ku e la kometé na mas ku un okashon, promé ku e víktima menor a hasi 12 aña, kual Ministerio Públiko a kondená e echo durante e tratamentu den promé instansia. Loke a hasi e akusashonnan mas grave, ta e edat di e víktima i tambe e echo ku el a keda konfiá komo tata di kriansa di e víktima i a hasi mal uzo di esaki.

Otro akusashon ku tabatin kontra di e akusado ta unda lo e mester a kometé akto inmoral kontra di un otro menor di edat. Ta trata aki di un echo ku e la kometé entre aña 2016 ku 2017, kual el a kuminsá hasi esaki na momentu ku e víktima tabatin 14 aña. E akusado lo tabata penetrá e víktima tantu ku su dede nan i tambe su parti íntimo.

Tur esaki despues ku lo e tabata kita pidjama di e víktima, kual aki e tabata hasi mal uzo di su edat i poder kontra di e menor. Tabata den ora nan mardugá ku e akusado tabata bai den kamber di e víktima, na momentu ku  e ta suponé di drumi, kual e tabata lant’é for di soño pa e por kometé su akto. Algu ku sigur a hala hopi atenshon, ta e echo ku e akusado a hasi mal uzo di poder kontra di subrina na e okashon aki.

Raul a kometé akto inmoral tantu kontra di su yu di kriansa i su subrina. Esaki tabata un di e motibunan dikon Ministerio Públiko a splika bon kla den promé instansia ku nan ta bai baha duru riba e akusado, mirando ku loke el a hasi ku algun menor ku tabata dependé di dje. Den promé instansia Ministerio Públiko a pidi 8 aña kual korte a kondená e akusado na 7 aña di prizòn. Raul na su turno a disidí ku e ta bai den apelashon ku e kaso, kual e siman aki su kaso lo ta pro forma den apelashon.