Gabinete ta intervení den servisio Belasting

65
Hoekstra: tres direktor-general pa servisio Belasting
DEN HAAG—Gabinete ta bai hasi kambionan den servisio di Belasting i ta bai dividí e servisio den tres parti.

Den un karta di minister Hoekstra di Finansa pa Tweede Kamer e ta informá ku servisionan di Duana i Toeslagen lo keda dividí. Kada un i servisio di Belasting ta haña nan propio direktor-general. E divishon ta parti di un reorganisashon. Aktualmente e servisio di Belasting tin un direktor-general. Resientemente el a tuma retiro. Pa años servisio di Belasting ta un preokupashon pa gobièrnu. E sistema di kompensashon (toeslagen) a resultá difísl pa ehekushon. Resientemente esaki a bira un problema asina grandi kaminda míles di mayornan a keda akusá inhustamente di froude. Finalmente a resultá ku ta fayo den e sistema, ku a pone e direktor tuma su retiro. E reorganisashon ta di dos den 5 aña. Den 2015 a reorganisá e servisio pa drecha outomatisashon i rekrutá trahadónan mas hóben. Pero esaki a bai robes pasobra hopi eksperto a hasi uso di e areglo di retiro. Den 2017 e direktor a tuma su retiro. Den 2014 tambe e servisio mester a stòp un proyekto di outomatisashon ku a kosta 203 mion euro. E reorganisashon aktual posiblemente tambe lo dura algun aña, segun un komunikado di ministerio di Finansa.