Gylmar “Jimmy The Kid”Concencion ta den Tumba 2020 ku Excellence

107
E ta den Tumba 2020 su di 50 edishon ku agrupashon musikal Excellence.

WILLEMSTAD,—-Durante di e último dia nan aki tin masha hopi negoshashon ta tumando lugá, rondó di festival di Tumba 2020 su di 50 edishon. Ayera ‘E Mulina’, a keda pone na altura ku gerente di e agrupashon musikal nobo den nos farándula Excellence a logra na gara un piska grandi pa nan bai kuné Tumba 2020.

E piska grandi aki ta trata di e kantante Gylmar “Jimmy The Kid”Concencion. Di informashon ku a drenta na mesa di redakshon di ‘E Mulina’, ta bisa ku, ayera den ora nan di atardi e desishon a kai, despues di un negoshashon ku a tuma lugá,entre e kantante “Jimmy The Kid” i gerente di agrupashon musikal Excellence.

Mas aleu ‘E Mulina’, a keda pone na altura ku Excellence ta bai partisipá den Festival di Tumba ku kuater kantante, ta trata aki di dos kabayero i dos dama. Ya preparashon nan a kuminsá kaba. Mester bisa ku agrupashon musikal Excellence ta un di e banda nobo nan ku tambe ta bai hasi nan debut den Tumba 2020.

I nan ta bai hasi esaki ku un kantante ku semper tin hopi atenshon pe na su partisipashon den Festival di Tumba, ta trata aki di “Jimmy The Kid”. Mester bisa ku “Jimmy” ta bai partisipá ku un komposishon di Tula Bernadina i Gedion Chandler lo bai ta su areglista.