Haiti ta konmemorá 10 aña di temblor ku a kousa devastashon na e pais

64
Destrukshon total ku tabatin dies aña pasá despues di e temblor.

PORT-AU-PRINCE – E presidente di Haiti, Jovenel Moise, i otro miembronan di gobièrnu a konmemorá e di dies aniversario di e temblor devastador registrá dia 12 di yanüari di aña 2010. Esaki a keda hasí ku un seremonia selebrá den e komunidat di Saint-Christophe i otro na e kurá di Museo del Panteón Nashonal Haitiano.

Na Saint-Christophe, unda a dera diferente víktimanan, e kabesante di estado a sa di depositá algun flor den presensia di desena di periodistanan.

Port-Au-Prince i otro lokalidatnan a resultá práktikamente destruí pa e movementu di magnitut 7 riba skala di richter, kua a kousa mas di 300.000 morto, un number ainda mas grandi di personanan heridá i a okashoná ku mas di 1.5 mion persona mester a evakuá.

Dia 12 di yanüari di aña 2010, ta un dia ku ta keda rekòrdá ku hopi doló, huntu ku famia i amigunan. Hopi te ainda ta di luto pa e morto prematuro di nan sernan kerí.

Dia 12 di yanüari a keda deklará na Haiti, komo e dia di konmemorashon i reflekshon dediká na memoria di e víktimanan di e desaster kousá pa e temblor ku a asotá e pais dia 12 di yanüari di aña 2010.

Durante e dia aki, e bandera nashonal ta keda pegá na mitar, i diskotèk i otro establesimentunan similar ta permanesé será. Emisoranan di radio i kanalnan di televishon a programá emishonnan spesial i músika trankil.

Den oranan di djasabra tras di lomba, Moise a indiká ku el a risibí un proposishon pa rekonstrukshon di Palasio Nashonal despues di e konkurso lansá pa Grupo di Trabou i Reflekshon pa e Rekonstrukshon di Palasio Nashonal i e Unidat di Konstrukshon di Bibiendanan i Edifisionan Públiko.

Di otro banda, e organisashon di defensa i promoshon di derechinan humano a yama e poblashon na partisipá den un marcha den oranan di ayera, na algun kaya di e kapital di e pais, pa asina konmemorá e dies añanan di e temblor aki.

E ophetivo di e marcha aki tabata pa sensibilisá e siudadanonan relashoná ku menasanan ku ta kai riba poblashon debí na e mal kondishonnan di bibienda i tambe pa pidi outoridatnan pa tuma medidanan nesesario pa redusí rísiko i dañonan ku e tipo di fenómenonan aki por provoká.

Tambe a plania un representashon artístiko relashoná ku e impakto físiko di e tragedia pa ku e víktimanan. Pa esaki a invitá públiko na partisipá den e marcha aki, kua tabata yená ku rekuerdo.

E organisashon no gubernamental ta konsiderá nesesario pa organisá e tipo di aktividatnan konmemorativo aki, den señal di solidaridat ku esnan ku a sa di sobrebibí e katástrofe aki, pero ku tòg a resultá afektá físika òf sikológikamente.