Hóbennan menor tabata terorisá nos pais ku atrako

2376
De P. riba grabashon di atrako.
WILLEMSTAD,—- 2 hóben ta wòrdu sospechá di a kometé diferente atrako aki na Kòrsou, unda nan a keda konfrontá ku esakinan durante tratamentu di nan kaso den su kontenido. Ta trata aki di G. C. i G. de P. ku tabata dilanti wes pa diferente kaso di atrako, miéntras R. D. tambe tabata tei huntu ku nan pa un kaso di atrako ku lo tabatin den su kontra. Segun Ministerio Públiko ku C. i de P.  tabata terorisá Kòrsou ku nan aktonan.

De P. i C.  kende tabata menor na momentu ku nan a kometé e echonan, a atmití mayoria di e kasonan ku tabatin den nan kontra, despues ku tabatin asta grabashon di e atrakonan. Ta trata aki di atrako ku a tuma lugá na Westpunt 26 di novèmber di aña 2018, unda lo a kita un Ipad for di e víktima, despues ku a yega ku machete na kas di e víktima ku kara tapá, pa menas’é i kita su pertenensia.

Den e kaso aki tabata sospechá e hòmber D. tambe di tabata presente, unda e la ninga esaki. Otro atrako ku tabatin kontra di e hòmbernan de P. i C. , ta un kaso ku nan lo a kometé 20 di novèmber 2 aña pasá, unda nan a atmití di a kometé e echo. Tabata un atrako ku nan lo a kometé na Toko Do kual nan lo a bai ku kaha di plaka di BAB, ku tabatin un montante di 500 florin aden.

Tur esaki despues ku a drenta e negoshi unda a kue e víktima di nashonalidat chines choka, kual a drenta bai patras i kue e kaha di plaka bai kuné. E di 3 atrako ku tabatin kontra di e duo ta unda nan lo mester a bai Jia He Minimarket 16 di novèmber 2 aña pasá, kual nan a bai ku 1000 florin di e negoshi. E sospechosonan a yega den e negoshi miéntras kore bai direkshon di e víktima i despues a kore bai kue e kaha di plaka .

E di 4 kaso di atrako ku tin kontra di e duo, ta unda nan lo a bai Skina Kayente Minimarket 11 di novèmber 2018, kual nan a kita 400 florin for di e empresario i tambe nan lo a bai ku un kaha di hanskun. Esaki nan lo a hasi dor di drenta e negoshi ku machete kual a menasá e víktima, pa bai ku su pertenensia nan. E di 5 atrako, ta unda nan lo a bai Happy Shop 6 di novèmber 2018, unda bou di menasa a kita 600 florin, laiter i tambe kaha di sigaria.

Esaki despues ku nan a drenta e negoshi ku machete i menasá e víktima. C.  a ninga di ta involukrá den e kaso di atrako na Westpunt, pero e la atmití tur otro kaso ku tabatin den su kontra. De P. a atmití tur kaso ku tabatin den su kontra. Dookie a para riba su inosensia, ounke el a keda rekonos’é primeramente pa su mama.

Ministerio Públiko a pidi 24 luna di kual 12 ta kondishonal pa De P. i tambe 100 ora trabou boluntario  miéntras pa C.  a pidi 12 luna di kual 10 ta kondishonal. Pa e hòmber D. a pidi 18 luna di kual 6 ta kondishonal ku  2 aña prueba ku 100 ora trabou boluntario. Djabièrnè awor lo dikta sentensia.