Hòmber ta hoga na Playa Kanoa 

587
Playa Kanoa- Ayera den oranan di mainta polis a dirigí un patruya pa Playa Kanoa. Einan un persona mester a guli bastante awa. Na yegada e promé informenan a indiká di tabata trata di un hòmber di edat ku mester a bai landa i a konfrontá problema den laman.

Mesora esnan ku tabata na e sitio a mira loke ku a sosodé i a drenta laman pa saka e hòmber ku ya tabatin algun minüt ku e mester a bai bou di awa. E hòmber konosí komo “Fifi” den e área aparentemente, mester a dal algun drinks i bai landa. E laman ku tabata basta brutu mester a pone ku e hòmber no tabata por a sali for di dje i a bai bou di awa. Na momentu ku esnan ku tabata na e sitio a saka e hòmber for di laman a kuminsá ku reanimashon. Na yegada di ambulans a sigui reanimá e víktima pero no tabata por a hasi nada mas pa e hòmber i e la bin fayesé.