Míles di personanan evakuá pa erupshon di volkan serka di Manila

54
Volkan ku a hasi eksploshon den oranan dia ayera i a pone ku mester evakuá personanan den serkania.

MANILA – Miles di personanan a keda evakuá den oranan di djadumingu na vários lokalidat na e parti sùit di Manila. Esaki debí na temor di un erupshon inminente di volkan Taal, situá na un isla serka di e kapital di Filipina.

E Instituto di Volkanogia i Temblor di Filipina a subi e alerta di 1 pa 4, for di un skala di 5, despues ku e situashon a intensifiká durante dia i inkluso a generá un erupshon di huma na un kilometer di altura.

Outoridatnan a pone nan mes den marcha pa evakuá e munisipionan di San Nicolas, Balere i Talisay, serka di e volkan situá na 65 kilometer sùit di Manila.

Segun e datonan di aña 2017, e poblashon di e tres munisipionan aki ta situá entre 6 mil i 10 mil abitante.

Personal di Krus Kòrá di Filipina a move direkshon di e zona pa asina yuda ku e labornan di evakuashon.

Di su banda, e aeropuerto internashonal Ninoy Aquino di Manila, situá na sùit di e kapital, a anunsiá kanselashon di tur buelo, tantu di yegada komo salida, debí na erupshon di e volkan.

E loke ta keda ekspulsá for di e volkan a yega na tur e bario nan di Manila, ku ta situá na masoménos 60 kilometer leu di e volkan.

E Departamento di Salú a atvertí ku e eksposishon di senisa por kousa problemanan di salú i pa esaki a rekomendá ku e abitantenan di e zona nan afektá evitá airu liber i den kaso ku hasi esaki tòg, pa usa algu pa tapa wowo, boka i nanishi.

Míles di turistanan ta bishitá Taal kada aña di nobo i algun ta realisá ekskurshonnan riba esaki. E volkan a sa di mata 1.300 persona na aña 191 i 200 na 1965.