Protestanan na Teherán pa e echo ku e benta avion di Ukrania abou

62
Grupo di personanan ku a presentá pa manifestá den fin di siman tras di lomba.

TEHERAN – Vários shen iraní a topa den fin di siman tras di lomba na e Universidat Amirkabir, na Teherán, pa asina protestá kontra e gobièrnu di Hasán Rogani i di e echo ku djarason siman pasá, a benta un avion di Ukraine International Airlines ku 176 pasahero abordo, abou.

Ademas di e protestanan, a detené e embahador di Reino Uní na Iran durante algun ora. E agensia di notisia iraní Tasnim, ta indiká ku e diplomátiko ta akusá di instigá e protestanan.

Den oranan di djadumingu, e diplomátiko mes, Rob Macaire, a gradisí via di Twitter pa tur e apoyo ku el a risibí i a ninga su partisipashon den e manifestashonnan.

E presidente di Estados Unidos, Donald Trump, ta sigui e protestanan na Teherán di aserka, segun loke e mes a anunsiá via su kuenta di Twitter.

Segun medionan di komunikashon di e pais, esnan ku a asistí na e protestanan tabata pidi dimishon di e mandatario, kende den oranan di mainta a atmití ku e avion a keda bentá abou komo un eror di Forsanan Armá durante e tenshon entre Estádos Unídos i e pais. Esaki ta un situashon ku inkluso tin henter mundu na un hilu.

Hopi di e universitario nan na e sitio kongregá tabatin bela i rekuerdo di e víktimanan ku a pèrdè nan bida pa kousa di e misil di fabrikashon ruso, pero ku a keda lansá pa eror pa e ehérsito iraní pensando ku e avion komersial tabata algu otro.

E suseso a keda produsí algun ora despues ku Teherán a lansa un atake ku misil na dos base na Irak ku tabatin sòldánan i efektivonan estadounidense komo forma di vengansa pa asesinato di Qasem Soleimani, dia 3 di yanüari último na man di Estádos Unídos.

Inkluso e sekretario di Estado di Estádos Unídos, Mike Pompeo, a hasi uso di Twitter pa papia di e situashon, indikando ku e pais mes ta kansá di mentiranan di régimen, di korupshon, ineptitut i brutalidat di nan mando.

Di su banda, e lider di Movimientu Verde, di Iran, Megdi Karroubi, a pidi tambe e dimishon di e outoridat máksimo di e pais. Den un komunikado publiká, Karroubi a puntra dikon outoridatnan iraní a tarda asina tantu pa informá públiko relashoná ku e motibunan berdadero pa kua e avion a aksidentá.