Quique Setién mister nobo di  Barça te ku 2022

60
Fot quique: E lo ta e mister nobo di Futbòl Club Barcelona. Ta trata di Quique Setién ku ta un veterano di 61 aña.
 

CAMP NOU,  – Basta rumornan ta loke tabatin e último dianan tokante e puesto di mister den e ekipo di FC Barcelona, i porfin ayera nochi ora di Barcelona a yega na un desishon final.

Barça a anunsiá e destitushon dje mister, Ernesto Valverde, miéntras ku e la hasi ofisial e kontratashon di Quique Setién komo mister nobo dje plantel blaugrana te ku 2022.

E plantel den próksimo oranan lo bai emití un komunikado ofisial na unda lo splika  ku Quique Setién lo tuma kargo dje banki di ekipo prinsipal di Camp Nou te na final dje temporada.

Quique ku ta un veterano di 61 aña a akseptá e reto pa kondusí e plantel den loke ta un krísis habri ku tin aktualmente den e organisashon. E último frakaso dje plantel di pèrdè kontra dje ekipo di Atletico Madrid den semifinal di Superkopa tabata esun ku a poné ku awe Valverde no ta mister mas dje ekipo blaugrana.

Quique Setién ta tuma e kargo komo mister di un plantel ku ainda ta bibu den tres kampeonato diferente ku aktualmente ta tumando lugá. Nan ta líder den  LaLiga, nan buskando nan klasifikashon pa kuartfinal di Champions League kontra di Napoli, miéntras ku nan ta kuminsá e lucha e luna (yanüari) aki den e torneo di “Copa Rey”.

Ernesto Valverde ya no ta entrenadó di FC Barcelona.

E plantel azulgrana a anunsiá e destitushon dje entrenadó despues di dos temporada ku e tabata na mando dje kamerin “culé”,  porsierto na unda e la gana dos liga,  un “Copa Rey” i un Superkopa di Spaña, pero no a duna e rendimentu spera den kompetensia na nivel Europeo.

Un dje eks astronan di Futbòl Club Barcelona a pidi kabes dje mister

Rivaldo di kende ta un eks hungadó di  FC Barcelona a kritiká e mister, Ernesto Valverde, despues dje derota kontra di Atlético Madrid den e partido di semifinal dje Superkopa di Spaña.

E brazilero a konsiderá ku ekipo mester plania e destitushon dje entrenadó mesora.

“Lo no sorprendemi ku e ekipo pone na riesgo su kontinuidat.   Por ta awor aki òf na final dje temporada”, asina Rivaldo a duna di konosé algun dia atras.

Awèl parse ku ayera ku e gritu di Rivaldo a yega na e direktiva di FC Barcelona ku e destitushon di Valverde.

Promé ku e mister nobo Setién tabata papia di e kontratashon di  Xavi Hernández, pero e último aki ninga pa yega mesora na ekipo Catalan.  E eks mediokampista ku ta aktual entrenadó dje ekipo di  Al Sadd ta riba kaminda pa akseptá e reto pa bira mister di FC Barcelona, pero no den winterstop aki.

Djasabra último tabatin un reunion entre e delegashon di Barça forma pa, Òscar Grau (CEO),  Eric Abidal (sekretario tékniko) i Xavi, porsierto ku  a sirbi pa aserka e bandanan ku otro pa asina analisá proyektonan den futuro. No strañabu nada ku Xavi bira entrenadó di Futbòl Club Barcelona den futuro serkano.