Riechedly Bazoer a anotá den kousa pèrdí pa Vitesse

166
Riechedly Bazoer.
WILLEMSTAD—E mediokampista di e ekipo di Vitesse ku ta hunga den Eredivisie na Hulanda, Riechedly Bazoer, a anotá djasabra último pa duna su ekipo bentaha, pero finalmente nan ta kai vensí 3-1, den wega amistoso, durante di nan trainingscamp na Portugal.

Esaki entre e diferente di nos muchanan ku tabata den akshon, pa loke ta futbòl den eksterior, durante di e fin di siman ku ta tras di lomba. Esakinan a hunga di e siguiente manera:

Leandro Bacuna a hunga 90 minüt pa Cardiff City ayera, den wega ku nan a topa Swansea City i a finalisá sin konosé anotashon den Championship na Inglatera.

Kenji Gorre a inisiá i a hunga 80 minüt pa Nacional den Segunda Liga na Portugal ayera. Un ke otro den otro wega ku no a konosé anotashon, unda Nacional a topa Oliveirense.

Tantu Roshon van Eijma pa Roda JC, komo Shermaine Martina pa MVV Maastricht, tabata na banki ayera komo suplente sin a logra mira akshon, den wega bálido pa e di 2 divishon na Hulanda, unda e ekiponan a empatá na 2 gol.

Jetro Willems a inisiá i a hunga 90 minüt pa Newcastle United, den Premier League na Inglatera djasabra. Esaki ora ku nan a logra 1 punto, empatando na 1 gol ku Wolverhampton Wanderers.

Juninho Bacuna tambe a hunga kompletu djasabra. Esaki pa Huddersfield Town den wega di Championship na Inglatera, ora nan a kai vensí 2-1 kontra Barnsley. Tabata wega unda ku Bacuna a risibí karchi hel.

Lutsharel Geertruida i Tyrell Malacia a inisiá i hunga 90 minüt, miéntras ku Leroy Fer, kende tambe a inisiá pa Feyenoord ku ta den Eredivisie na Hulanda, a hunga te na sosiegu, den wega amistoso ku nan a kai vensí 4-2 kontra Borussia Dortmund na Spaña.

Riechedly Bazoer a inisiá, anotá na minüt 49, habriendo anotashon den wega  pa duna Vitesse bentaha riba MSV Duisburg, den wega ku nan a aki vensí 3-1. Tabata wega amistoso ku a mira akshon na Portugal, unda faltando 10 minüt pa pitaso final, Bazoer a keda remplasá. Sinembargo su kompañero di ekipo, Armando Obispo si a hunga kompletu, den kousa pèrdí, unda den parti final di e wega, den apénas 6 minüt, nan ta risibí 3 gol kontra.

Jurrien Timber a drenta pa hunga durante di e último 10 minütnan pa Ajax. Un ke otro den wega ku nan a klousurá nan trainingscamp na Qatar, ora nan a gana di Club Brugge, ku skor di 3-1. Su ruman ohochi Quinten i tambe Sontje Hansen, si no a logra pa mira akshon.

Roly Bonevacia, a hunga hinter wega, ora ku su ekipo Al-Faisaly a sufri derota mínimo kontra Al-Raed den Saudi Arabia Pro League.

Michael Maria tambe a inisiá i hunga kompletu. Un ke otro den wega ku su ekipo Adelaide United a sufri goliada ku skor di 3-0 na man di e ekipo di Pertha Glory, den wega di Hyundai A League na Oustralia.

E futbolista arubano Denzel Dumfries kapitan di PSV den Eredivisie na Hulanda a hunga durante di e promé mitar, den wega amistoso unda nan a aki vensí 2-1 kontra Eupen na Qatar.