Todibo ya a keda mira banda Gelsenkirchen pa firma kontrakt

70
FOT todibo: Jean-Claire Todibo a keda di hür pa FC Barcelona na ekipo aleman Schalke 04. Riba potrèt por mira su yegada na e aeropuerto di Düsseldorf ayera mèrdia.
 

GELSENKIRCHEN,  – E sekshon komo hungadó fia di Jean-Claire Todibo na e ekipo di Schalke 04, lo bira un realidat den e próksimo oranan. 

E defensa azulgrana ya ta na Alemania pa firma su kontrakt, miéntras ya e la keda kaptá pa kámaranan dje medionan di komunikashon kendenan a mir’é na  aeropuerto di Düsseldorf. E korant ‘Bild’ tabata esun ku a publiká e imágen dje hungadó na e aeropuerto.

Di e manera aki  Todibo lo bai purba su suerte den futbòl aleman despues ku den Barça e no a logra haña e minütnan ku e tabata pretendé.  Resientemente un leyenda di futbòl manera e aleman, Lothar Matthäus, a sigurá ku Todibo ta e mihó defensa sentral ku e la mira den akshon.

Todibo solamente a partisipá den dos partido di Liga di kua ta kuater minüt kontra di Getafe i 73 minüt den Camp Nou kontra di Sevilla, porsierto den partido ku tabata titular. Na Giusseppe Meazza tambe e la hunga un total di 90 minüt, porsierto den partido ku tabata bálido pa Champions League kontra Inter.

E sekshon di hungadó fia di Todibo lo ta te final di aktual temporada, porsierto ku ta laga Barça ku tres defensa sentral so den e plantel.

Gerard Piqué, Clément Lenglet i Samuel Umtiti ta esunnan ku lo keda na e disposishon di e mister aktual Ernesto Valverde òf pa esun ku por bira su sustituto.  Todibo lo keda di hür te ku zomer di e aña aki.

No mas ku siman pasá nos a publiká ku e ekipo aleman di Schalke 04 den e último oranan a bira un rival duru pa AC Milan, pa loke ta intenshon di logra e sekshon di hür dje defensa sentral franses di Barcelona, Jean-Claire Todibo.

Segun a keda informá pa e periodista italiano, Gianluca Di Mario, e propuesta di  Schalke 04  tabata parse ku lo por a kombensé Todibo.

Ora ku tabata parse ku Todibo lo a bai akseptá e oferta di AC Milan si esaki lo sigur’é ku lo tabata  un sekshon  komo hungadó di hür pa seis luna, sin ningun tipo di opshon di kumpr’é definitivamente.

Asta a keda publiká ku Massara di kende ta direktor deportivo dje plantel di AC Milan, tabata na Barcelona pa negoshá e pas’é dje hungadó.

Tabatin asta e vershon ku e representante di AC Milan a regresá satisfecho despues di su reunion ku Jean Clair-Todibo i tambe su agente na Barcelona, miéntras ku e la kalifiká komo di “positivo” e kombersashon mantené ku ámbos.

Pero apesar di tur esfuerso dje ekipo italiano segun tur kos ta indiká  ta  Schalke 04 ta esun ku a logra su transferensia. E defensa franses dje ekipo di FC Barcelona tambe tabata keda fuertemente vinkulá ku ekipo di Bayer Leverkusen.

Awor  debí na e moveshon ariba menshoná  e  uruguayo di Barça B, Ronald Araujo, por bai haña oportunidat pa hunga den e plantel prinsipal dje ekipo Catalan den kaso mester.