“Adama Traoré ta mas rápido ku Cristiano Ronaldo”

159
Jetro (man drechi) den lucha ku e atakante.
INGLATERA—Jetro Willems a keda sumamente impreshoná ku Adama Traoré, kende ta atakante spañó, ku ta hunga ku e ekipo di Wolverhampton Wanderers, den Premier League na Inglatera. Esaki despues di a hunga ku su ekipo Newcastle United, kontra di e ekipo ariba menshoná, i tabatin e atakante komo kontrinkante direkto.

Despues di ya a hunga den pasado kontra Cristiano Ronaldo, e futbolista YDK a duna di konosé di tabatin e mas difísil kontra Traoré.

“Ningun otro hungadó ku mi a yega di hunga kontra di dje, no ta mas rápido ku esaki. E ta inkreiblemente, manera un bestia. No solamente e ta lihé pero tambe e ta fuerte. Ta wòrdu bisá ku e ta e futbolista mas rápido di mundu i awor ku mi a hunga kontra dje, mi por konfirmá esaki.

Mi a hunga kontra Ronaldo i e ta rápido, pero no manera esaki si. Ronaldo ta téknikamente hopi bon, pero tin ora bo por defendé un hungadó asina, muchu mas lihé ku unu ku ta sumamente rápido i tambe fuerte.

Hungando kontra Cristiano Ronaldo tabata difísil, pero un wega manera e último aki, nunka mi a yega di hunga”, Jetro Willems a duna di konosé den un entrevista realisá.