Guaidó ta krea komishon ku kua e ta spera di kita señal di Telesur for di e gobièrnu

102
Juan Guaidó, kabesante di oposishon aya na Venezuela.

CARACAS – E lider opositor Juan Guaidó, kende ta rekonosé pa mas di 50 pais komo presidente enkargá di Venezuela, a anunsiá e kreashon di un komishon ku kua nan ta spera di kita e gobièrnu di Nicolas Maduro for di kòntròl di e señal di e kanal multiestatal di Telesur.

Esaki a indiká ku despues di evaluá e opshonnan hurídiko i institushonal pertinente, a tuma e desishon di inisiá un proseso di reorganisashon i reskate di Telesur pa pone esaki na servisio di bèrdat, pluralidat, demokrasia venezolano i regional.

Esaki a sigui splika ku e ‘Komishon Presidensial pa restrukturashon di Telesur’, lo ta konformá pa un ekipo kua nan nòmbernan lo keda anunsiá den e próksimo dianan. Simplemente a indiká ku ta trata aki di un ekipo di profeshonalnan ku eksperensia i independensia , kendenan ta dirigí e proseso pa pone e señal na servisio di libertat.

E komishon lo asumí a tarea di kordiná e aliadonan di e region pa asina inisiá e proseso di sustishon efektivo di e señal aktual pa un kontenido plural i demokrátiko ku lo keda transmití i sintonisá progresivamente den i pafó di Venezuela.

Guaidó a delantá for di djasabra tras di lomba, ku durante un asamblea hiba kaya na ost di Caracas, ku el a anunsiá pa rekuperá señal di Telesur, e kanal fundá 14 aña pasá, ku ta konta ku partisipashon di Nicaragua, Bolivia, Uruguay, Cuba i Venezuela.

Segun Guaidó, e stashon ku ta defendé e yamada na revolushon bolivariano, na poder for di aña 1999, i su aliadonan polítiko na mundu, ta promové gruponan terorista.

E presidente di Telesur, e periodista kolombiano Patricia Villegas, a reakshoná na e mesun ret sosial anunsionan di Guaidó.