Hóben yu di Kòrsou ta publiká su buki titulá ‘Carolina: A Slave’s Tale’

Un biaha mas Kòrsou ta den spòtlait

2035
Christopher Vierbergen firmando kopia pa un persona ku a atkerí su buki.

MIAMI –Den un seremonia ofisial ku a wòrdu ten’é na Miami, Christopher Vierbergen, un hóben di 24 aña di edat a publiká su promé buki ofisial titulá ‘Carolina: A Slave’s Tale.’ E buki ta bai tokante di Carolina, un katibu fiktisio i su bida na Kòrsou den añanan 1800.

Christopher Vierbergen huntu ku su famia na momentu ku el a lansa su buki.

Na e seremonia, Christopher a konta kon el a yega na skibi e kuenta di Carolina, kiko tabata su inspirashon, i na ken e buki aki ta dediká. El a hasi uso di e oportunidat tambe pa lesa un parti di e buki pa e públiko presente, i  firma kopia pa esnan ku a atkirí su buki.

Christopher a skohe pa publiká e kuenta di Carolina na ingles i buska e merkado internashonal promé. E motibu pa hasi esaki ta pasombra e ta studiando na Estádos Unídos  i kier a trese un kuenta tokante di Kòrsou su historia, su leyendanan i su kultura dilanti na mundu henter. Segun Christopher, e kuenta ta unu di gran signifikashon no solamente pa eduká i rekordá pueblo di Kòrsou tokante di su pasado, pero pa laga mundu hinter tambe sera konosí ku e maravioso kultura di Kòrsou, un bes mas poniendo nòmber di nos isla den spòtlait. Banda di esaki, e kuenta ta sirbi tambe pa duna nos un bista nobo di kon e tempunan aya ta konektá ku tempu di awor, alabes sea gradesido pa nos posishon den bida.

E kuenta ta konta kon Carolina, kual a nase komo katibu, ta wòrdu kitá for di su plantashi, i ta keda transportá pa un plantashi nobo, kaminda e no konosé niun hende i mester hasi esfuerso pa kumpli ku e demandanan di su Shon nobo. Pero na e mesun plantashi aki e ta sera konosí ku e amor di su bida, kual ta hasi su estadia un tiki mas soportabel, te ora ku un desgrasia sosodé kual lo kambia tur kos. ‘Carolina: A Slave’s Tale’ a wòrdu publiká ofisialmente na Estádos Unídos, pero ta disponibel awor na Kòrsou tambe na Mensing’s Caminada.