Mas di 100 venezolano detené ku arma di kandela i droga

107
Algun di esnan detené i materialnan hañá na e sitio.

LIMA – Outoridatnan polisial di Perú a detené un total di 124 integrante di un gèng kriminal, mayoria di nashonalidat venezolano, na Lima. Esaki nan tur lo keda penalmente prosesá i seguidamente ekspulsá for di e pais.

E operativo polisial a keda realisá den oranan di djadumingu último den un hospedahe di e Playa Punta Negra, na masoménos 40 kilometer sùit di Lima, unda esnan detené tabata selebrá un fiesta rondó di un pisina.

Outoridatnan a realisá un kòntròl na e grupo relashoná ku e investigashon di e asesinato di un empresario peruano, ku tabata kasi biahe pa Estádos Unídos, den un restorant di ‘fastfood’ den oranan di siman pasá na Lima.

Entre e detenidonan tin un total di 114 venesolano, 73 hòmber i 41 muhé, kuater kolombiano, un hòmber i tres muhé, segun outoridatnan polisial di Perú.

E agentenan ademas a haña dies arma di kandela, munishon, kòmpiuter i un kantidat no presisá di droga sintétika.

Segun a keda indiká, e Ministerio di Interior i Outoridatnan Polisial, den kordinashon ku Migrashon, lo aktivá un Plan Migrashon Sigur, pa prosedé na ekspulshon.

Na Perú tin un total di 860 mil venezolano bibá durante e último tres añanan, mayoria di kua a solisitá e Pèrmit Temporal di Permanensia ku e Gobièrnu peruano a krea na rais di e krísis polítiko i humanitario na Venezuela.

Den e mesun sentido, e presidente di Perú, Mattin Vizcarra, a pidi outoridatnan hudisial pa tur peso di lei kai riba e personanan aki.

E kabesante di estado a felisitá outoridatnan polisial pa e hasi un intervenshon i tambe realisá detenshon na sùit di Lima, di mas ku 120 persona ku awor ta keda investigá.

E ministerio di interior a splika ku esnan ku resultá responsabel den e echonan grave aki, lo keda prosesá pa hustisia peruano i e restu lo keda ekspulsá, kumpliendo ku e trámitenan di migrashon.

Ademas a añadí ku mayoria di e venezolanonan ku a ingresá na Perú, a drenta den e aktividat ekonómiko legalmente, pero tambe a krusa frontera ku personanan ku awor tin mal bida òf ta delinkuente.