Minister Zita Leito Den situashon di krísis mester usa medida di krísis

158
Minister Zita Jesus – Leito

Willemstad,– Segun minister Zita Jesus Leito gobièrnu tin hopi tempu ta komuniká ku plataforma Bandariba pa loke ta trata e lokual sigur señor Gerard ta papiando di dje.

E ta bisa ku ta usa plataforma Banda Riba komo un ehèmpel pa wak kon por yega na algu pa mira kon por duna mas alivio na esnan ku ta para riba lista ta warda un kas. E ta bisa ku a sinta na diferente okashon ku Plataforma Bandariba i ku hasta a pone un tim pa sinta ku nan, pero e kosnan no ta bai fásil i ku a inventarisá e kosnan i wak e lista di hendenan ku tin basta tempu ta warda i tambe hendenan ku a kue tereno ilegal traha kas riba dje. A a bin topa ku hopi kos riba e lista di Plataforma Banda Riba i a konstatá ku e kosnan no ta bai lihé i e plataforma tambe a atmití esaki.

“Un di e puntonan den e investigashon, ta mustra ku e kos aki ta tuma tempu. Mester hasi tur e trabounan ku tin retraso grandi i no tin sufisiente hende pa hasi e trabounan aki riba un spit ku tur hende ta deseá, pero ta hasiendo esfuerso pa duna alivio na hendenan ku tin hopi tempu ta warda”.

E ta bisa ku pa ataká e aparato, ataká e minister i ataká gobièrnu, no ta bai yuda den e kaso aki, paso dia ku e a yega el a bin haña retrasonan enorme i ku no ta kasonan di aworakí, sino di hopi dékada kaba, pues 20 pa 30 aña atras.

“E sistema di atendé ku e asuntu aki ta un situashon di krísis i den situashon di krísis mester tuma medida di krísis i a sinta ku señor Gerard kaminda a bisa ku stap pa stap mester kana e trayekto. A pone hopi struktura pa wak tòg kon por bai solushoná e problema aki, pero un problema di hopi tempu asina, bo no ta bai solushon’é den un luna”, asina minister ta bisa.