Prima di penshun lo subi den 2020

72
48% di fondonan di penshun lo oumentá nan prima den 2020
DEN HAAG—Pa un grupo grandi di hulandesnan e prima di penshun lo subi den 2020, segun investigashon di Financieele Dagblad.

Esaki ta nifiká ku e dunadónan di trabou mester paga mas prima loke ta bai afektá nan ganashi i tambe salario di trahadónan. Den e investigashon anual Financieele Dagblad i PensioenPro a evaluá e desaroyo di primanan di penshun. Resultado ta ku serka 48% di fondonan di penshun e prima lo subi den 2020, òf partisipantenan ta haña menos penshun pa nan kontribushon. Den e fondonan aki tin alrededor di 600.000 trahadó ta partisipá. Asina e primanan pa e fondo di penshun den sektor di konstrukshon a subi ku 10%, den agrikultura 13% i sektor alimentisio 12%. Den otro sektornan kaminda e prima ta keda igual, nan lo akumulá 20% menos penshun. Pa basta tempu fondonan grandi tin ménos kapital ku nan por paga penshun den futuro.  Tin dos manera pa reforsá e fondo, sea kòrta den penshunnan òf oumentá e primanan. Fondonan por skohe pa pidi mas prima di dunadónan di trabou pa haña forsa. Trahadónan tambe mester paga e oumento. Esaki no ta konta pa penshonadonan. Pa no afektá trahadónan dòbel, minister Koolmees a suavisá e reglanan.