Segun Urny Floran: Tin detenidonan ku ta forma problema unda ku pone nan den SDKK

306
 Polis di tim di akshon a bai SDKK pa kosnan no Sali for di man.

Willemstad,– Durante oranan di mainta ayera tabatin un kaso di bringamentu ku a kulminá den hinkamentu di un prezu den e instituto SDKK.

Vigilante a papia ku señor Floran tokante di e kaso di hinkamentu den prizon kaminda e ta splika ku e loke a pasa ta ku tabatin un pleitu entre dos detenido kual despues a bira un bringamentu kaminda un di nan a saka un artefakto i kuminsá hinka e otro kuné, kaminda el a risibí hinká na su pechu i na su kara. E ta bisa ku departamentu médiko di prizòn a atendé ku e víktima i a bisa pa mand’é CMC pa e haña atenshon mas avansá i el a keda transportá ku ambulans.

E direktor di e instituto ta splika ku esun ku a wòrdu hinka ta di inisial N.H kende a wòrdu hinká i e tin 34 aña di edat, miéntras ku esun ku a hink’é ta C.B di 35 aña i ku nan dos tabata biba huntu den sèl.

E ta sigui splika ku e dos detenidonan aki a yega di pleita ku otro den pasado, pero a atendé esaki i nan a keda bon ku otro bibando huntu. No a spera loke a pasa ayera.

E ta splika ku tin detenidonan ku tin hopi problema na unda ku nan biba den prizòn i gerensia ta purba tur sorto di kaminda pa ubiká nan, pero na unda ku nan bai nan ta buska problema.

Señor Floran ta bisa ku tin un kantidat di detenido den prizòn ku ta bou di protekshon i ku tin menasa riba nan, pero no por bisa ku nan bida ta den peliger. E sospechoso di ayera, a ser kehá na polis i polis lo sigui atendé ku e kaso.