Trio den korte pa importashon kokaina

79
lote di 161 kilo kokaina
HAARLEM—Awe korte di Haarlem lo trata e kaso proforma kontra tres hòmber sospechá di importashon droga via aeropuerto di Maastricht.

Ta trata di un lote di 161 kilo kokaina. E droga tabata den un karga di flor for di Sur-Amerika i a keda konfiská den aprel 2019. E kaso a keda deskubrí despues ku den yanüari 2019 duana a haña 27 kilo di kokaina den flor na Schiphol. Marechaussee a anunsia den yüni ku for di aprel a detené 10 hòmber riba sospecho di trafikashon droga via dos aeropuerto. E detenshonnan a tuma lugá den Almere, Amsterdam i rondó di Schiphol. E sospechosonan ta prosedente di Hulanda, Azerbeidzjan i Letland. Tur tabata trahadó den un kompania di logístika ku ta hasi entrega na Schiphol. E kompania ta situá banda di airport pero marechaussee no a divulgá unda. Den e kaso di Maastricht Vugar G (41), Mechman M (35) i Petrus B (47) mester presentá den korte. Tur ta enkarselá.