Amsterdam ta yuda hóbennan ku hopi debe

92
350.000 euro pa e proyekto
AMSTERDAM—Hóbennan di Amsterdam (18-27 aña) ku hopi debe por hasi un apelashon for di otro luna riba munisipio.

E munisipio lo negoshá ku kreditornan i tuma e debe. E suma ku sobra e hóben ta paga den término segun su forsa. Si e hóben hasi esfuerso pa traha òf studia por eksonerá sierto sumanan. Debenan ta sòru pa hopi stress. Di e manera aki Amsterdam kier yuda hóbennan traha na nan futuro. Banda di tuma parti di e debe, e munisipio ta hasi un donashon di 750 euro pa kada hóben na e kreditornan. Amsterdam no ta e promé munisipio ku ta introdusí un maneho asina. Mas munisipio a start ku e maneho. Munisipio di Tilburg a informá ku anualmente nan ta sera 700 areglo di pago pa un término di 3 aña. E hóben mester haña espasio pa desaroyo. Investigashon di Nibud ta mustra ku debenan di hóbennan ta keda okashoná entre otro ora nan surpasá nan balanse na banko, debenan di estudio na DUO i retrasonan den pagonan na seguronan di malesa i servisonan di selular. Debenan di estudio no ta inkluí den areglo di Amsterdam. Den 2020 e munisipio ta spera di yuda 150 hóben. A reservá un suma di 350.000 euro pa e proyekto.