7 hulandes detené den investigashon bèlga

145
mas di 600 kilo konfiská den e kaso
ANTWERPEN/ROTTERDAM—Polis bèlga a detené shete hulandes i tres bèlga den un investigashon grandi riba trafikashon di kokaina.

Polis a haña pista di e grupo despues di konfiskashon di 413 kilo di kokaina luna pasa den un konteiner den haf di Antwerpen. E droga tabata prosedente di Santo Domingo. Un hòmber di 51 aña di Boom ta e lider den e kaso segun polis di Antwerpen. E tabata buska e konteinernan den haf. Djaluna último polis a sigui e hòmber durante un transporte nobo kaminda el a hiba un konteiner di Ecuador pa un lots den Bornem. Aki e karga a pasa den dos otro vehíkulo. Unidatnan spesial a tene entrada den e lots kaminda a detené tur sospechoso. Despues a detené e shofùr na kas. Den espasionan sekretu den e vehíkulonan a haña 203 kilo di kokaina. Tambe a konfiská armanan. Den un entrada na Genk polis a haña mas arma i eksplosivo. Polis ta sospechá ku e organisashon ta responsabel pa mas transportenan di droga. E investigashon ta kontinuá.