Herido grave den kaso maltrato na Eersel

107
violensia ku herido grave

EERSEL—Den un villa den e bario Eersel Brabant un dama i dos hòmber a keda atraká i maltratá djasbara anochi.

Un di nan a keda gravemente heridá i a keda interná den hospital miéntras e otronan por a bai kas despues di tratamentu médiko. No tin informashon di e motibu di e maltrato. E maltrato a tuma lugá alrededor di 7:30 anochi. Na prome instansia polis a papia di un atrako pero e sospechosonan no a bai ku nada. Tin tur indikashon ku e meta di e atrako tabata violensia segun un bosero polisal a bisa Omroep Brabant. Polis ta spera di haña mas informashon despues di tende testigunan. Algun bisiñanan no ta sorprendé ku e maltrato. Segun nan tabatin bastante bochincha djaweps i djabièrnè den e kas. Segun un otro bisiña e kas tabata esun di mas bunita den Eersel, pa despues keda bashí i awor e ta keda habitá pa migrantenan laboral. E sospechosonan a kibra e porta dilanti di e villa, tambe esun paden. Segun e gerente di e kompleho e otro habitantenan ta hopi spantá i no kier biba einan mas.