Kòrsou tin atenshon pa ku desaroyo na nivel di WHO pa ku e vírùs di novel corona

195
Ta trata di un Virus ku a kuminsa na China.
Willemstad – Dia 31 di desèmber 2019 e ofisina di e Organisashon Mundial di Salú (WHO) na China a keda informá ku tin kasonan di pulmonia di órigen deskonosí dektektá na Wuhan, provensia di Hubei na China. Mientrastantu e kasonan a keda identifiká komo e vírùs novel corona (2019-nCoV) serka outoridatnan Chines dia 7 di yanüari 2020.

Organisashon Mundial di Salú (WHO) a aktivá e ret di monitoreo tantu regional i mundial i ta urgí tur pais pa ta alerta i tambe prepará. E síntomanan di e infekshon ta entre otro difikultat pa hala rosea, keintura, tosamentu, rosea kortiku/ problema pa hala rosea. Den kaso mas severo e infekshon por kousa pulmonia, por presentá un sindrome agudo i severo di kapasidat di respirashon, malfunshon di nir i hasta por ta kousa di morto.

Ainda no tin informashon konfirmá di kon e virus ta keda transmití. Tin informashon ku tin kaso di transmishon di hende pa hende. Tumando na kuenta ku e ta kousa infekshon respiratorio ta rekomendabel pa tuma medidanan di prekoushon pa redusí e riesgo manera e.o. laba man ku awa i habón ku frekuensia, evitá kontakto ku personanan ku tin un infekshon respiration. Pasaheronan ku síntoma di infekshon agudo respiratiorio mester limitá kontakto ku otronan pa peganan, ora tosa òf nister tapa boka i nanishi ku lensu di papel i tira esaki den kos di sushi i no riba suela, laba bo man refrekuentemente ku awa i habón i buska kuido médiko. Kasonan raportá pa WHO ta indiká ku tin kasonan na China i a registrá unu na Thailand, Hapon i Korea. Tambe a registrá un promé kaso na Washington, Estados Unidos. Ta trata den tur e último paísnan aki  di un persona ku a bishitá China i a kontagiá aya.

Servisio di Salú Públiko (UO G&Gz) ta keda monitoria i traha estrechamente ku outoridat i profeshonalnan den kuido i otro organisashonan pa ta alerta pa kualkier kaso partikular. Na momentu ku tin mas informashon relevante i di prevenshon Servisio di Salú lo informá komunidat.