Bishitante  femenino mester a kita blo sunú i ser mirá pa trahadónan maskulino

Ayera na SDKK:

5007
WILLEMSTAD—Ayera a sosodé un situashon na SDKK ku a perkurá pa trouma pa e dama ku a pasa e mal eksperensia aki.

Ta asina ku ayera un dama ku ta lantando un fundashon pa hustamente yuda prezunan a bai SDKK pa un akto di bishita. Promé ku e la bai e  tabatin kontakto ku e direktor Urny Floran i mester bisa pa lokual ta trata e kombersashon aki tur kos a kana bon. Na porta nan a brua pone su nòmber ku e ta un trahadó di reclassering, siendo ku  el a bisa ku e tei na nòmber di un fundashon ku ta den e fase di kristalisá su mes den su aspektonan hurídiko.  Kosnan a kana robes na momentu ku el a drenta SDKK i ku e mester a pasa un proseso di kontròl, ya ku nan tabata bou dje impreshon ku e ta mama di un yu di un detenido.

Ta parse ku e echo ku e mester a bishita sierto presu a trese un tipo di deskonfiansa serka e personal ku a disidí na hink’é den un espasio pa e la pasa un kontròl rigoroso. Esaki a keda a hasi den promé instante ku e porta habri i ku 2 bewaker femenino para ei nan.  Ku e porta habri, ken ku pasa por a tuma nota ken ta den e espasio pa keda kontrolá.  Durante e kontròl rigoroso aki nan a kuminsá ku kontrolá su tas. Nan a bòltu su tas saka delaster un kos for di den dje pensando ku lo por tabatin algu ilegal aden. E parti doloroso i humiante tabata na momentu ku nan a bis’é pa kita su paña i keda blo sunú, siendo ku e porta tabata habri. E la kita su paña 1 pa 1 pensando ku na momentu ku e tin di yega na e parti di panty i brazièr ku e bewakernan femenino lo a sera e porta.

E den su spantu dje kontròl no a ni para ketu ku nan no a sera porta.  Pa su gran sorpresa e bishitante a realisá na momentu ku e tabata para ku lomba ku nan no a sera e porta, siendo ku ya e la kita su paña i keda blo sunú. Ta na momentu ku e tabata den e posishon aki el a disidí 2 biaha pa kue su kara bira wak patras i tuma nota ku tabatin trahadó maskulino ku a pasa dilanti dje porta ku tabata hanchu habri. E ta kalkulá ku den e área kaminda e kontròl a tuma lugá tabatin 4 trahadó femenino i 3 maskulino.

Sunú man na laira lomba pa porta

P’e tabata doloroso kon para ku man na muraya i lomba pa e porta ku e por a mira sigur na 2 okashon trahadónan maskulino pasa. Ora ku ya e tabatin un ratu para asina, e trahadónan femenino a pidié pa e la buk na 2 okashon pa asina wak si nada no ta kai. Pa lokual ta trata e proseso aki tampoko nan no a sera e porta di forma total. Despues ku nan a kaba ku e parti aki di kontròl, e trahadónan femenino a bai pafó i bisa ku e no tin nada riba dje. Promé ku nan a lag’é bai, nan a bolbe listra den su tas i nan no a haña nada komprometido. Despues ku el a pasa den e proseso humiante aki e la puntra si e por a haña un kombersashon ku Urny Floran, pero nan a mustr’é ku no tabata posibel. Ora ku el a sali for di e sentro penitensario e la disidí na yama Urny Floran sin éksito algun. E la keda purba yega den kontakto kuné te ku anochi sin éksito algun.

Lizaima da Costa Gomez

Komo ku e no por a haña Urny Floran i tumando na kuenta loke ku a  sosodé e la disidí na drenta den kontakto ku e konosido abogado Lizaima da Costa Gomez. E la tene kontakto ku abogado Lizaima da Costa Gomez pa kont’é kiko a sosodé kuné, pa sa kiko ta e stapnan presis ku e tin di dal den kuadro di loke ku a tuma lugá ayera ku a lag’é basta troumatisa.   Lokual ku a sosodé ku e bishitante femenino aki tabata asina doloroso ku e tabatin problema pa drenta kas i konfrontá su famia. Te na momentu ku nos ta redaktando e artíkulo aki e no tabatin kara pa enfrentá su yunan.

Basha sanger siendo na estado

E indignashon di loke e la pasa aden tabata asina fuerte ku el a basha sanger, siendo ku e ta na estado. Mester bisa hasta ku e la kita bèrgwensa i mustra reporteronan di Vigilante kon su panty a keda shusha na sanger. Segun su vershon na Vigilante ta asina ku e tin 3 yu i ku esun último ku e la duna lus tabata 3 aña pasa. E echo ku el a basha sanger ayera a pone tuma e desishon pa ayera mes a bai su dòkter pa esaki eksaminá wak kiko a sosodé. Miéntras tantu ta asina ku e ta spera di por haña un reunion ku Urny Floran pa e por splik’é e eksperensia ku el a pasa aden. Segun su deklarashonnan na Vigilante awe e lo bolbe bai su dòkter pa otro eksaminashon.