Dama sekuestrá liberá pa team aresto

229
Dienst Speciale Interventies (DSI) a logra liberá e dama ku su yunan
ALMERE—Ayera polis a informá ku team di intervenshon spesial DSI a liberá un dama sekuestrá den Almere dia 1 yanüari.

Den e kaso polis a detené 6 persona. Dia 31 desèmber 2019 deskonosínan a sekuestrá un dama (31) ku su dos yunan di 3 i 7 aña den Amsterdam-Noord. Despues ku e dama logra alertá polis via un konosí, polis a start un investigashon amplio di búskeda ku a kondusí na un kas den Almere. Dia 1 yanuari miembronan di Dienst Speciale Interventies (DSI) a logra liberá e dama ku su yunan. A detené un total di 10 persona. Despues di a presentá dilanti hues komisario 6 a keda enkarselá. Ta trata di 5 hòmber i un dama entre 19 pa 28 aña di Amsterdam, Lelystad i Purmerend. Polis a konfiská 5 arma kandela i 200.000 euro serka diferente sospechoso. Investigashon ta indiká ku algun di e sospechosonan ta forma parti di e ‘rapscene’ den Amsterdam Zuidoost. Polis a duna e informashon awor pasobra un dje detenidonan tabata den limitashon te ku djaluna.