Dani Olmo serka di firma kontrakt ku RB Leipzig

77
Fot dante: Segun último informashon Dani Olmo (R) por ta biahando pa Alemania pa kaba di sera un akuerdo ku e ekipo aleman RB Leipzig

BERLIN,  – Dani Olmo ta preparando su salida for dje ekipo di Dinamo Zagreb segun tur kos ta indiká. 

Djaweps e ekipo kroata na unda e eks delantero di FC Barcelona ta militá aden, a reuní ku RB Leipzig pa inkorporashon dje futbolista den e ekipo aleman.

Segun informashon publiká ayera den medionan di komunikashon e hungadó ya no ta partisipá mas den e rutinanan di entrenamentu dje ekipo di Dinamo Zagreb, miéntras ku di otro banda a keda divulgá ku e ta na punto di biaha pa Alemania pa sera e kontrakt.   

Despues dje sorprendente salida for di  FC Barcelona ku rumbo pa  Dinamo Zagreb na 2014 akambio di Alen Halilovic, e hungadó a destaká konsiderablemente den ekipo kroata.

For di den zomer último a sali masha hopi ekipo  ku tabata interesá den e hungadó spañó, pero Dinamo no a akseptá ningun oferta.  Den winterstop aki parse ku ekipo kroata a kambia di  idea i ta dispuesto na bende e delantero.

Algun dia atras tabata  sirkulá den medionan ingles ku e plantelnan di  Chelsea i Manchester United lo ta bai trata di negoshá pa e transferensia di  Olmo for di Dinamo Zagreb.

Promé ku esaki tambe a sali publiká ku Napoli lo bai un lucha total ku otro ekiponan ku ta interesá den e delantero. Dinamo Zagreb tabata spera ku den winter aki òf zomer próksimo nan por risibí riba 25 mion euro  pa e tòp talento spañó.

Siman pasá tambe a keda divulgá ku kasi tabatin un akuerdo sera ku AC Milan pa 20 mion euro, pero esaki manera a keda spekulá lo no a sigi mas. E “zaakwaarnemer” dje harmado di wega ku aktualmente ta pertenesé  Dinamo Zagreb, tabata eksigí un komishon di shete mion euro dje traspaso for di e ekipo italiano.