Direktiva no por bai di akuerdo ku punto di agènda pa baha direktiva i Konseho di supervishon

358
Señor George Curiel ta pidi sosionan pa bin reunion pa asina krea un ACU nobo.

Willemstad,– Direktor di ACU señor George Curiel a bisa ku ACU mester pasa den un proseso di transformashon, kaminda e konseho di direktiva no por eksistí mas di hendenan ku ta traha boluntario, paso si bo wak e responsabilidat ku e hendenan aki ta karga segun lei, no por sigui asina. Mester bini un kambio di struktura, pero esaki mester bai huntu ku kambio di kultura.

ACU tin ku bai bèk na loke su statutonan ta bisa, i esei ta nifiká habri posibilidat pa sosionan spar i e statuto no ta bisa habri posibilidat pa sosionan fia. Dor di hasi esaki lo por brinda oportunidat pa hasi fiansa.

Señor Curiel ta bisa ku for di ora ku reunion general a proponé nan, ta pa mas lihé posibel organisá elekshon nobo i esaki tambe ta loke Banko Sentral a manda bisa. For di novèmber bin ariba a hasi tur trámite pa ban elekshon fin di mart, mirando ku tin sierto límite di tempu ku mester tuma.

Pues pa fin di mart lo tin elekshon i señor Curiel ta bisa ku si drenta un karta ku sosionan ta pidi pa pone un punto riba agènda, manera ta e kaso kaminda a pidi pa manda hunta di direktiva kas, no por koperá ku un situashon asina, paso den kaso ku sosionan vota pa manda direktiva i komisarionan kas, e koperativa ta keda sin direkshon i pues e punto di agènda aki direktiva no por para su tras, asina e presidente di ACU señor Curiel a bisa.

Curiel ta puntra dikon e personanan ku ta bringando e direktiva ta hasi tantu kos asina, siendo ku aki tres luna tin elekshon.