Luis Rojas lo ta e mènedjer nobo di Mets

89
Rojas, ku tabata fungi komo coach di kontròl di kalidat, lo remplasá Beltrán, ku a keda saka for di e klup siman pasa, sin ku ni sikiera el a dirigí un solo partido

NEW YORK,– E kaso di Carlos Beltran a kue Mets for di base. Faltando tres siman pa temporada kuminsá, nan a nombra e sustituto di Beltran, ku ta otro latinoamerikano, ku ta den e banki di nan mes. New York ta serka di nombra e dominikano Luis Rojas komo nan mènedjer nobo, ta loke e gerente general Brodie Van Wagenen a bisa ayera.

Esaki lo ta e di kuater mènedjer di Mets den e último dos aña i mei i di tres den kuater  luna.

“É konosé e ekipo aki. E tabata parti di dje aña pasa”, Van Wagenen a komentá. “E konosé e hungadónan  i e sa kon komuniká ku nan. Tur e peloteronan ku ta bin bèk riba e roster tin un

relashon kuné, i esei ta di hopi balor pa nos na e momento aki”.

Rojas, ku tabata fungi komo coach di kontròl di kalidat, lo remplasá Beltrán, ku a keda saka for di e klup siman pasa, sin ku ni sikiera el a dirigí un solo partido, despues ku e tabata impliká den e skandal di robo di señal dor di Astros di Houston.

Van Wagenen a bisa ku e akuerdo ku Rojas lo ta di mas aña. “Mi ta kere ku e ta e persona ku tin su ideal”,  Van Wagenen a sigui bisa. “Ta e kultura ta e loke nos ke krea”.

Rojas, di 38 aña, ta yu di Felipe Alou, eks mènedjer di Expos di Montreal i  Giants di San Francisco,  i ruman di e hungadó retirá di Liga Grandi Moisés Alou.

“Luis a gana e puesto aki. Literalmente el a prepará su mes henter su bida pa bira mènedjer “, asina Van Wagenen a añadí. ” E ta ser konsiderá komo un di e miónan pa tuma desishon den e organisashon  aki”.

E ta bira e di seis dominikano ku e kargo di mènedjer den Liga Grandi, siguiendo  pasonan di su tata, Tony Peña, Luis Pujols, Juan Samuel i Manny Acta.