Sammy Sosa ketu bai ta leu for di Salon di Fama

104
Sammy Sosa, a keda pega den loke ta ganamentu di porsentahe di voto riba e tarhetanan di votashon. Esaki tabata di shete biaha ku el a aparesé riba e tarhetanan di votashon, pues e tin tres oportunidat mas.  

CHICAGO,– E eks honronero di  Chicago Cubs, e dominikano Sammy Sosa, shete aña pasa a figura pa di promé bia riba e karchi di votashon pa drenta Salon di fama di  Liga Grandi i a drenta e diskushon pa keda inmortalisá na mes momentu huntu ku figuranan manera Barry Bonds i Roger Clemens. Su sifranan so ya kaba tabata un aspekto di diskushon banda di su karera kontroversial i su lista di hazaña.

Segun tempu tabata transkurí, Bonds i Clemens a bin gana mas apoyo di e votadónan di e Asosashon di Reporteronan di Beisbòl di Nort Amérika (BBWAA,) Sosa, di otro banda a keda pega den loke ta ganamentu di porsentahe di voto riba e tarhetanan di votashon. Esaki a bolbe pasa djamars, ora ku Sosa a keda leu for di Cooperstown, pero el a haña e votonan  sufisiente si pa e keda den kontienda na 2021.

E inmortalnan nobo di beisbòl ta e kapitan di Yankees Derek Jeter, ku a aparesé ku 396 di e 397 tarhetanan  depositá, i e eks outfilder di Rockies Larry Walker (76.6%). Ámbos lo drenta  e Tèmpel di e Inmortalnan na Cooperstown, New York, huntu ku e leyenda di Cardenales Ted Simmons.

E nòmber di Sosa a aparesé riba 55 tarheta, ku ta representá 13.9%, un kresementu chikitu  en komparashon ku su resultado di 2019 (8.5%). Ni Bonds (60.7%) ni Clemens (61%) no a haña e votonan sufisiente pa drenta Salon di Fama, pero tur dos a subi na kantidat di voto e último añanan.