Ta 4 polis so ta trahando den e departamentu di outo hòrta

Miéntras ku ladronisia di vehíkulo ta masha haltu:

48
WILLEMSTAD—Lokual ku ta kombèrtiendo su mes den un pesadia grandi pa masha hopi hende ta e kasonan di ladronisia di outo. Tur siman tin diferente persona ku a keda kombertí den víktima pa lokual ta trata e delito aki, sin ku kasi niun ta keda solushoná te pa pone man riba e kriminalnan.

Den transkurso dje dia di ayera Vigilante a risibí un tip for di den KPC ku ta mustra riba e echo ku e departamentu di outo hòrta no tin kasi personal mes. E la hasta indiká na Vigilante ku ta 4 polis tin ta traha den e departamentu. Tambe e la señalá na Vigilante ku ni vehíkulo na drechi nan no tin pa hasi nan trabou. E fuente polisial a indiká na Vigilante ku niun minister di hustisia ku a sinta no a krea e senario pa hasi e departamentu di outo hòrta mas efisiente.