Ulanda ke mira Plan di Invershon pa Kòrsou

588
Kumpli: gobièrnu di Kòrsou mester a presentá un plan strategiko di invershon. 
Punda– Gobièrnu ulandes, pa por yuda ekonomia di Kòrsou krese, ke mira un Plan di Invershon.

Konforme e Akuerdo di Kresementu, pa medio sèptèmber 2019, gobièrnu di Kòrsou mester presentá e plan di invershon. Esaki ta enserá e.o. un lista di proyekto pa desaroyo ekonómiko. Pero tin indikashon ku te ainda, no tin nada konkreto mièntras 5 luna a traspasá. Eksepto pa un wèpsait ku algun proyekto ya konosí, gòbièrnu di Kòrsou ta sigui hérmetiko pa lokual ta trata un plan stratégiko di invershon.

Tur lokual tin na e momentonan aki ta un wèpsait ku gobièrnu a lansa, unkorsouprospero.com. Mas ku esei te ainda no ta riparando nada. Den kuadro pa implementashon di e proyektonan ekonómiko, Ulanda ke mira un banko invershonista. Mediante artíkulo 5 di e kombenio firmá, Ulanda a instruí Kòrsou, pa kapitalisá e instituto Invest Curaçao.

Esaki lo duna Kòrsou derechi pa fia for di fondonan ulandes, un suma di 180 mion florin repartí den 3 aña. Invest Curaçao tei risibí e suma di 180 mion pa yuda stimulá ekonomia via di e kuenta di kapital. Ademas, Invest Curaçao tei risibí adishonal 60 mion florin for di e benta di UTS. Riba esaki, tambe tin hopi inklaridat. Aparentemente e sèn di benta generá despues di a bende UTS ta riba un kuenta na Banko Sentral. Den mesún artíkulo 5 den e Akuerdo di Kresementu, insiso 3, Ulanda ta instruí Kòrsou pa sigui kapitalisá Invest Curaçao, for di tur medionan originá mediante benta di propiedat i kompanianan anónimo gubernamental.

Invest Curaçao, lo tin akseso na 180 mion florin dirèkt fo’i fondonan ulandes, 60 mion fo’i benta di UTS i riba 60 mion florin mas despues ku bende 34% den CPA. Ademas via di Banko Sentral, CBCS, tin destiná 200 mion dòler, 360 mion florin riba kuentanan di fris ya asigná pa bai den kaha di gobièrnu di Kòrsou.

Riba e parti aki, Jose Jardim di CBCS no kier a duna detaye, pero durante un rueda di prensa e la afirmá ku Ministerio Publiko a outorisá pa “lòs” e sèn. E struktura di garantia ku Invest Curaçao tei ópera den dje ta kai dirèkt bou di RVO na Ulanda, RVO ta Rijksdient voor Ondernemingschap.•