“E tékniko argentino no ta ku Atlétiko Flamingo”

196
Atletiko Flamingo.
KRALENDIJK—“No ta bèrdat ku e tékniko argentino ta bèk ku Atlétiko Flamingo. Tabatin algu bèrdat si, ku esun ku tabata dirigí, durante di e último dianan. Esaki a pone ku nos ta tratando na trese solushon, unda kosnan ta ‘on hold’ awor aki i awe tardi nos lo reuní den nos seno, pa fiha kiko ta kiko”, tabata palabranan di Rugo Semper, dirigente di e ekipo di Atlétiko Flamingo. Esaki djasabra último den oranan di dia.

Miéntras ku seguidamente durante di e fin di siman, Semper a konfirmá ku e ekipo lo keda próksimamente bou di direkshon di un di nan téknikonan di kategoria hubenil i otro di kategoria femenino, huntu ku un otro ku ta di staf, tanten ku ta trata na yega na un solushon definitivo. Esaki mirando ku e tékniko ku tabata ku nan ekipo, a hala tras i inkluso tabata den tribuna ayera siguiendo e wega, unda hustamente Atlétiko Flamingo a mira akshon.

Nan a logra triunfo pa goliada ku skor di 4-0 riba ATC, den wega ku finalmente a lanta mas problemátiko pa wòrdu solushoná. Un ke otro unda segun informashonnan risibí for di den stadion na Rincon ayera nochi durante di e partido, ku tabatin hungadó ku a rabia i manifestá nan malkontentu i inkluso ekspresá di lo ta kla ku e ekipo.

Entre esakinan tabatin Denjercik Virginie, oriundo di nos isla, kende a inisiá wega sorpresivamente na banki komo suplente, pa seguidamente bandoná banki i su kompañeronan di ekipo, debí ku aparentemente e no tabata di akuerdo di tabata na banki.

Miéntras tantu Yurcik Seinpaal, Jurvel Clara, Jurven Koffy i Diangelino Leocaria tabata esnan ku a anotá pa Atlétiko Flamingo gana ATC 4-0 ayera.