Eksitoso torneo di pinpòn dediká na rumannan Davelaar

135
Despues ku tabatin premiashon den kategoria femenino.
WILLEMSTAD—Durante di e fin di siman ku a pasa Federashon Tènis di Mesa Kòrsou, tabatin e torneo Donic ku tradishonalmente ta habri aña kuné. E biaha aki e la keda organisá den kuadro di selebrashon di Sentro Bario Sta Maria ku nan di 60 aniversario.

Komo mucha di Sta Maria, e tempu aya praktikando pinpòn den e sentro di bario aki ku Old Timers, a skohe Chaleko Davelaar komo e persona ku lo wòrdu honrá durante e promé anochi i pa seguidamente su ruman muhé (q.e.p.d.) Alice Davelaar e siguiente anochi.

Chaleco ta alabes miembro honorabel di federashon, miéntras Alice Davelaar tabata kampion di Kòrsou den kategoria di dama na 3 okashon.

Djabièrnè a inisiá e kompetensia habrí pa A-klas, unda tabatin 16 inskripshon, entrenan 2 femenino. Den e partido final Dimitri Leon a mustra su eksperensia i ta gana di e hóben Ching Ho 3-0 i asina logra e titulo máksimo.

Seguidamente tabatin kompetensia pa e damanan, unda tabatin 8 inskripshon. Despues di luchanan tenas e final a bai entre e hulandes Julia Jansen i e arubano Josilienne Boekhoudt, ku e arubano logrando e titulo máksimo.

Famia Davelaar tabata bon representá ámbos anochi i na final nan a wòrdu enkargá ku e premiashon.