Gobièrnu di Maduro ta denunsiá atake terorista

69
Delcy Rodriguez, kende a publiká mensahe riba su kuenta di Twitter pa kulpa Guaidó di e situashon.

CARACAS – Un kandela a afektá e instalashonnan di e empresa estatal di telekomunikashon CanTV i Movilnet den oranan di djasabra tras di lomba, na e sektor di Flor Amarillo de Valencia, estado Carabobo. Ta trata aki di un kompania anónimo nashonal di telefòn na Venezuela, segun a keda indiká pa Delcy Rodriguez.

Sin presentá ningun tipo di evidensia òf detaye, Rodriguez a indiká riba su kuenta di Twitter ku e kandela a keda provoká pa un atake terorista i ku esaki a kousa pèrdida total di material stratégiko di telekomunikashon nan.

Ademas a indiká ku e presidente Nicolas Maduro mesora a ordená restitushon inmediato di e material indispensabel i tambe pa investigá i di e forma aki kapturá esnan responsabel.

Ademas a indiká ku huntu ku e trahadónan di Movelnet i tambe CanTv lo presentá un plan di rekuperashon na e presidente Nicolas Maduro.

Rodriguez ademas a indiká ku e echo tabata un atake di e opositor, dirigí for di Washington, Estádos Unídos. Esaki refiriendo na Juan Guaidó.

CanTv i tambe Movilnet ta operá bou di e Ministerio di Poder Popular pa Siensia i Teknologia.