Jong Holland a bolbe reakshoná na tempu pa keda invikto

140
Jean Gaspar Baptist.
WILLEMSTAD—E ekipo trikolor di Jong Holland, djasabra último un biaha mas a reakshoná despues di tabata atras 2-0, pa asina regresá kas ku punto i keda invikto komandando den promé divishon di futbòl FFK.

Finalisando promé buèlta tabata kontra Centro Barber, miéntras ku djasabra último inisiando segundo buèlta, tabata kontra Inter/Willemstad.

Esaki den e promé di e dos weganan ku a mira akshon den Stadion Antoine Maduro na Kintjan djasabra tras di lomba. Tabata partido ku a keda dirigí pa rèfri Godfried Wawoe, kende a konta ku asistensia di Rayner Goedgedrag i Nadine Carolina na liñanan, unda Edsel Dimie tabata e di 4 ofisial di e partido.

Inter/Willemstad ku golnan di Gersinho ‘Ziño’ Constansia i un outogol di Germaine Geerman, ta kue bentaha di 2-0, promé ku Dwaylon Maria deskontá pa e trikolornan, pa asina e wega yega sosiegu ku e ekipo di Kintjan den bentaha di 2-1.

Seguidamente tabata durante di e parti komplementario, ku Jean Gaspar Baptist, ta sòru pa e gol di empate pa e trikolornan, pa asina e ekiponan regresá kas ku 1 punto, despues di mester a konformá ku empate na 2 gol.