Kampionato sòftbòl femenino di Karibe lo hunga na Kòrsou

94
Kòrsou su ekipo di sòftbòl femenino.
WILLEMSTAD—Federashon di sòftbòl di Kòrsou ta hopi kontentu di por a gana e derechi pa organisá kampionato di Karibe di sòftbòl femenino.

For di despues ku nos selekshon nashonal di sòftbòl femenino a konkistá e titulo di kampion suramerikano, direktiva a intentá, ku kontaktonan den region, pa por logra pa asina trese e próksimo torneo di Karibe, Kòrsou.

Despues a entregá un petishon ofisial, pa por yega na remarke pa organisá e prestigioso torneo aki, e bon notisia a drenta.

E torneo aki ta di hopi balor, pa motibu ku e pais ku titulá kampion di Karibe lo gana e derecho outomátikamente pa tantu weganan Sentro Amerikano i di Karibe na Panama City 2022 i tambe weganan Panamerikano (Panam Games) di aña 2023 na Chile.

E fecha di e kampionato Karibe pa sòftbòl femenino lo ta di 8 te ku 14 ougùstùs 2020.

Ya tin trabounan ku a inisiá kuné i próksimamente lo intensivá e trabounan di preparashon. Den e promé siman di mart, Federashon di sòftbòl lo pone un rueda di prensa, pa duna mas informashon riba e kampionato aki i tambe riba e aspektonan di preparashon.

Federashon di sòftbòl mesora ta hasi uzo di e oportunidat aki pa invitá tur negoshi ku kier ta parti di e evento grandi aki komo spònser/partner, pa tuma kontakto ku e presidente di Federashon Lernnerth Angela na number di telefon 517-7100 òf mail csberanobo@gmail.com.