Matansa serio registrá na Tailandia ku saldo di 30 morto

70
Personanan heridá risibiendo yudansa médiko na e sitio.

BANGKOK – Tailandia ta trata di bin bei for di un matansa inkreibel ku a keda registrá na e pais despues ku un militar, kende a keda asesiná pa polis, a mata 29 persona durante un atake na un sentro komersial, e tabatin vários rehen durante mas ku 15 ora.

Segun e promé minister di e pais a indiká, nunka no a registrá un insidente di e tipo aki na e pais i ta spera ku esaki nunka mas no sosodé tampoko.

Entre e víktimanan mortal, hopi di kua ainda mester keda entregá na nan famianan, tin 23 sivil, 3 agente polisial i 3 militar, ademas di esun responsabel.

E mandatario, kende a sifra esnan heridá na 52 i di kua 32 ainda ta interná den sentronan médiko, 8 den estado grave, a indiká ku mesora a brinda asistensia sikológiko na e víktimanan i famianan.

E atakante, un sargento identifiká komo Jakrapanth Thomma, di 32 aña di edat, a pèrdè su bida den oranan di ayera mainta despues di a keda rondoná den un supermerkado, na parti abou di e edifisio di e sentro komersial.

Outoridatnan polisial tailandes a publiká algun video riba retnan sosial, di un tiroteo intenso kontra e militar, kende den oranan di djasabra atardi a lòs bala kontra su kompañeronan promé ku el a hui i drenta den e sentro komersial i tira esnan den esaki.

E atakante tabata disponé di un arsenal di arma outomátiko, entre nan un M60 i un fusil HK33, huntu ku un kantidat grandi di bala ku el a hòrta for di un vehíkulo militar.

Huntu ku kurpa sin bida di e hòmber, a haña tambe kurpa sin bida di otro hòmber i muhé, kende nan presuntamente a keda usá komo eskudo humano.

Tailandia ta un di e paisnan na mundu ku mayor kantidat di arma, ku mas di dies mion entre legal i ilegal. Sinembargo, tiroteo òf atakenan ku arma di kandela no ta algu komun.