OM i KPC deliberando kon pa atendé ku e mal wega 

1994
WILLEMSTAD—Manera ta konosí último dianan tin un reto nobo ku partisipashon di 3 mucha, den kua e 2 nan banda ta hak esun meimei su pia, pone kai ku chèns di haña impakto fuerte na kabes ku tur e konsekuensianan ku esaki por trese kuné.

Ayera den dia a kore rumor ku tin un mucha di Albert Schweitzer interná te ku hasta el a fayesé, pero ta resultá ku tabata trata di rumor falsu.  Ta asina ku tin video lokal ta sirkulá riba Facebook den kua por mira hóbennan di un skol sekundario praktikando e mal wega aki. Riba e esun video aki por mira esun ku a bai abou, ta manera keha di doló. Kuerpo polisial i OM a tuma nota dje mal wega i mester bisa ku bosero di KPC a duna di konosé ku nan kier pa e muchanan stòp di forma inmediato ku e esaki.

Redakshon di Vigilante a kombersá ku Imro Zwerver kende a konfirmá ku no tabatin niun kaso di morto registrá, pero si nan no kier pa nos muchanan sigui práktika e mal wega aki. Ta asina ku tantu OM komo KPC ta den deliberashon pa sa kon ta bai atendé ku hinter e asuntu aki. E promé punto di lansa ta, ku loke por ser konstatá ta maltrato, kua ta kondena pa nos leinan. Ta asina ku si resulta ku e muchanan disidí ku nan ta práktika e wega aki kua por trese konsekuensianan laf, nan lo no basilá pa aktua.  Promé ku aktua nan lo hasi investigashon pa determiná kiko a pasa i abase di resulta di esaki pasa pa detenshon si mester yega asina leu. Tur lokual ku KPC kier kuminsá ku hasi for di awor ta atvertí e muchanan pa nan stòp ku e mal wega aki, di akuerdo ku deklarashonnan di Imro Zwerver.