Pareha i nan yu di 1 aña asesiná den nan bibienda

87
Pareha i nan yu di 1 aña asesiná den nan bibienda

TEGUCIGALPA – Un pareha hondureño i nan yu di 1 aña a keda asesiná den oranan di djasabra pa un hòmber armá ku a drenta den nan bibienda i a laga ademas otro yu di e pareha heridá.

E kaso di múltiple homisidio aki a keda registrá den e aldea Puerto Ric, di e departamento di Colon.

Outoridatnan, indikando loke testigunan a konta, a splika ku e víktimanan a keda ataká pa un hòmber armá, kende a drenta den oranan di mainta den bibienda di e víktimanan.

E víktimanan mortal a keda identifiká komo Antonio Diaz Garcia, di 26 aña, su kasá Marlen Guadalupe, di 25 aña i yu hòmber di ámbos, di apénas un aña di bida, José Garcia.

Otro yu muhé di e pareha, di 6 aña, identifiká komo Evelin Dayani Garcia, a resultá heridá i a keda hibá pa un sentro médiko di e siudat di Tocoa. Esaki sin ku a duna masha splikashon relashoná ku gravedat di su leshonnan.

E forsanan di òrdu públiko a rondoná i kontrolá e bibienda unda e matansa a keda registrá miéntras tabata warda yegada di e Forense di Ministerio Públiko pa hisa i hasi investigashon na e kurpanan sin bida.

A indiká ku te ainda no tin ningun persona detené pa e kaso i forsanan di seguridat ta investigando e krímen i te ainda no a logra determiná motibunan den e kaso aki.

Sinembargo, e promé spekulashonnan ta indiká ku e krímen ta debí na enemistat nan personal entre e víktima i e agresor, kende ainda no a logra keda identifiká.

E pais sentroamerikano ta registrá un promedio di entre 10 i 12 asesinato pa dia, loke outoridatnan ta atribuí na krímen organisá, narkotráfiko i gèng nan, konosí komo maras.

E teritorio hondureño ta keda uzá pa e paso di droga pa yega Suramérika ku destino Estádos Unídos.

Aña pasá, segun sifranan ofisial, a registrá na Honduras, un total di 3.996 kaso di homisidio, loke ta nifiká un 43.63 pa kada 100.000 abitante, loke ta pone nan komo un di e paisnan mas violento na mundu.