Randel Winklaar a ‘habri i sera’ ku gol

150
Randel Winklaar.

WILLEMSTAD—Tereno di bala di Stadion Antoine Maduro na Kintjan, djasabra anochi tabata esenario pa e wega entre e dos ‘Centro’ nan di nos promé divishon di futbòl FFK. Esaki ora ku Centro Dominguitu, dirigí pa Yacir Hyman a topa ku Centro Barber, dirigí pa Marc Muzo.

Tabata wega den kual e atakante di Centro Dominguitu, Randel ‘Djodjo’ Winklaar a habri anotashon for di algun sekònde di wega, promé ku konkluí 1 minüt di e partido, pa asina Dominguitu pika dilanti.

Miéntras ku na momentu ku ya un i tur tabata sperando e pitaso final, ku ya e tempu den stadion na ‘scoreboard’, no tabata konta mas i ku e wega empatá na 2, e ta anotá den pitu, pa asina kompletá su hattrick i duna Dominguitu triunfo i e 3 puntonan ku tabata den wega.

Rèfri Edsel Dimie a dirigí e partido aki, unda e tabatin asistensia na liñanan di Pablo de Avila i Rubineck Matilda, den wega ku Nadine Carolina a hasi e trabou na mesa.

Pa e ekipo di Centro Barber, tabata Norvianell Naar, kende a anotá den su partido di regreso, despues di un periodo di inaktividat den FFK, miéntras ku Roshyon Anita, a sòru pa e otro gol di Barber.

Tabata partido ku a alkansá sosiegu empatá na 1 gol i finalmente Centro Dominguitu ta gana 3-2 i a alehá leu for di e puesto di peliger despues di tabata den sotano i awor inkluso ta aserkando e promé 6 nan, ku bista riba playoff Kaya 6.