Tin interes pa Kenneth Pieters regresá den direktiva di FEBEKO

83
Di e shete ekiponan di “AA” Vigilante a papia ku 6 di nan i ningun no tabatin opheshon pa Kenneth Pieter regresá den direktiva. 

Willemstad,– Den kombersashon ku mayoria di e ekiponan den beisbòl “AA” , nos por a tende e nòmber di Kenneth Pieter zona. Ku esaki por konkluí ku ta deseo di mayoria ekipo pa Kenneth Pieter regresá den direktiva di FEBEKO. Mester bisa tambe ku esaki ta lógiko mirando e echo ku semper ku señor Pieter tabata den direktiva el  desplegá un tremendo trabou.

Kenneth a fungi pa hopi aña komo sekretario di FEBEO i tambe direktor di kampionato i semper el a hasi su trabou i hasta mas ku esei.

Por bisa tambe ku señor Pieter ta un di esnan ku semper tabata komuniká ku prensa sigur ora ta trata di resultadonan. (mester menshoná tambe Viveca Hughes último añanan).

Di e shete ekiponan di “AA” Vigilante a papia ku 6 di nan i ningun no tabatin opheshon pa Kenneth Pieter regresá den direktiva.  Kenneth ta un hòmber ku ta traha duru den tur loke ku e ta,  i e por aportá den e kaso aki tambe ku su eksperensia. Pues ta di mira kual ta e ekipo (nan) ku lo postulá señor Pieter pa direktiva.

Vigilante a trata di drenta den kontakto ku e propio Kenneth Pieter, pero e no a kontestá nos yamada. Nos lo sigui buska kontakto kuné durante dia awe.