Fuerte temporal ta paralisá siudat mas grandi di Brasil kousando un morto

122
Algun skol i negoshinan a indiká ku lo no habri nan portanan debí na e temporal.

RIO DE JANEIRO – E temporal ku a kastigá Sao Paulo den oranan di djaluna mardugá práktikamente a paralisá e mayor siudat di Brasil, ku su via nan prinsipal kompletamente inundá, liñanan di metro i trein suspendé i tráfiko totalmente kolapsá.

Segun e Kuerpo di Bombero di Sao Paulo, e estado mas poblá i riku di Brasil, den poko ora di áwaseru a registrá 16 diferente avalancha di tera na e kapital regional, 192 inundashon i 113 kaida di palu di mata.

E inundashon i avalanchanan di awa a blòkia paso di Tieté i Pinheiros, avenidanan amplio ku ta rondoná un riu ku ta pasa den Sao Paulo, ku kua a kolapsá tráfiko.

E servisio di algun di e liñanan di trein metropolitano i di metro a keda suspendé, meskos ku sirkulashon di diferente bùsnan públiko, pa kua abitantenan di e mayor siudat Suramerikano a haña nan konfrontá ku difikultatnan pa yega nan boka di trabou den oranan di ayera mainta.

E kompania di tránsito di e munisipio a manda tur su funshonarionan riba kaya pa organisá tráfiko i ousiliá shofùrnan ku nan vehíkulonan a keda pará unda tabatin inundashonnan.

E paralisashon di tráfiko, inundashonnan i menasanan di avalanchanan a obligá bomberonan di rekomendá pa permanesé na kas te na momentu ku e situashon keda normalisá. Pa e mesun motibu aki, algun skol i negoshi a avisá ku nan lo no habri nan portanan.

E normalisashon, sinembargo, lo por tarda debí na e echo ku Instituto Nashonal di Meteorologia a alertá di un grupo di nubianan ku ta den serkania i aserkando nan mes na Sao Paulo i ku awa lo a keda kai henter dia.

Bomberonan a indiká ku den oranan di ayera a haña kurpa sin bida di un hòmber di 33 aña ku tabata reportá komo pèrdí for di djasabra último, na momentu ku el a keda lastrá pa awanan di un inundashon registrá na Sao Bernardo Campo.