Un morto, tres herido i vários buelo kanselá pa falta di wer

152
Trabounan tumando lugá pa kòrta algun palunan di mata ku a kai riba kaminda.

GINEBRA – E tormenta Ciara ku ta afektá parti nort i sentro di Oropa, a kousa morto di un persona i a laga tres persona heridá na Suisa, unda e fuerte bientu a obligá na kanselá mas di 300 buelo na e aeropuertonan di e siudat di Zürich, Ginebra i Basilea.

E víktima mortal ta un outomobilista di 36 aña ku a pèrdè su bida den un aksidente di tráfiko na Freiburg, despues di aksidentá paso el a keda lastrá pa fuerte bientunan kontra man.

Esnan heridá ta un hòmber ku a keda gòlpiá pa e tapa di un kònteiner di metal lastrá pa e bientu na e lokalidat di Rickenbach i dos persona den e zona di Zürich ku a resultá lastimá ora ku a bai intentá kita un tènt for di un karetera debí na fuerte ráfaganan.

E mal tempu ku a yega na Suisa den oranan di djadumingu atardi, a toka tera ku ráfaganan di bientu di asta 150 km pa ora, motibu pa kua mester a kanselá 120 diferente subida i bahada na e aeropuerto di Zürich, miéntras ku na Ginebra mester a kanselá 30 diferente buelo.

E fuerte bientunan aki a provoká ademas kanselashon i tardansa den diferente trein, i den oranan di djadumingu a kousa kaida di un palu di mata ku a kai riba un wagòn di trein sin pasahero na e lokalidat di Moutier.

E kaida di palunan i otro ophetonan tambe a provoká tráfiko na kareteranan, spesialmente na nort. Esaki ademas a kousa diferente dañonan material i pèrdida di koriente ku ta obligá na sera tùnelnan temporalmente na San Gotardo, Seelisberg, Flüelen i Mosa, sentro di Suisa.

Outoridatnan di e pais a deklará e segundo mayor nivel di alerta pa tormenta nan na vários zonanan di e pais i na diferente lokalidat di e área ku ta papia aleman, na sentro i ost di e pais, a kanselá lèsnan di forma temporal.