Breezy FM ta mudando pa bai den pleno sentro di suidat

139
El a para duru riba su NO.   

WILLEMSTAD,—-Di informashon ku a drenta na mesa di redakshon di ‘E Mulina’, direktamente for di Isla di Flamingu Boneiru, ta bai rondó di e radio emisora nobo ku aña pasá a kaba di kumpli un aña di eksistensia . Ta trata aki di Radio Breezy ku tin na kabes e talentoso hóben Dj Lokutor  Ramsey Krips.

T’asina ku nos fuente na Boneiru a bisá ‘E Mulina’, ku Radio Breezy ta mudando for di e sitio ku nan ta aktualmente pa un sitio nobo. Nos fuente a bisa ‘E Mulina’, ku pronto e radio lo bai kuminsá operá den sentro di suidat “kaya Kòrsou”.

Pero pa nos sa mas kos rondó di e mudansa di Radio Breezy, ‘E Mulina’, a drenta den kontakto ku Ramsey Krips direktamente for di Boneiru. ‘E Mulina’, a sali bisa Ramsey ku nos tin informashon ku pronto bo ta bai kambia di sitio pa ku bo radio emisora. T’asina ku el a kuminsá hari pa despues ninga den tur sentido di palabra ku nos informashon no ta kuadra ku realidat.

Pero den mes un kombersashon el a bisá ‘E Mulina’, ku ta un pakus ta bin den “Kaya Kòrsou”, kaminda ku nan lo bai bende paña deportivo. Nos a keda para duru riba Ramsey, pero e tambe a keda para duru riba su palabra. Na final di nos kombersashon, nos a bisé ku kòrda ku “Bèrdat semper ta gana mentira”, pero tambe nos a bisa Ramsey Krips ku kòrda semper ku “Tempu ta e mihó maestro”, aki el a kuminsá hari i yama nos ayó.