Deborah Gomez ku un piesa nobo di Gòspel riba merkado

367
Su piesa nobo “Mi ta yu di Dios” sigur lo mishi ku bo kurason tambe.  

WILLEMSTAD,—-Ayera den ora nan di mainta ‘E Mulina’, a risibí for di man nan di e kantante Deborah Gomez, un CD di su piesa nobo. Ta trata aki di un piesa den género di Gòspel ku ta hiba di titulo “Mi ta yu di Dios”.

Pa hopi ku no konosé e kantante Deborah Gomez, ta trata aki di e kantante ku na aña 2016 a gana e Festival di “Un kanto pa Kòrsou”. Mester bisa ku for di e tempu ei, e kantante su popularidat a krese i bira hopi grandi. Pero esaki no a susha su kabes, paso e la keda kanta den e género musikal ku e ta stima mes, ku ta esun di Gòspel.

T’asina ku Deborah a bisa ‘E Mulina’, ku ya su piesa nobo ta na tur radio-emisora lokal i ku e ta spera ku su piesa lo haña e atenshon ku e ta meresé. “Un kantika ku mi ta kanta for di profundo di mi Kurason”, el a bisa. “Mi ta yu di Dios”, ta un piesa ku sigur lo bai toka diferente hende su kurason.

Esaki ta nifiká ku for di awe tur hende por yama na kualke un di e radio-emisoranan i pidi pa e piesa nobo “Mi ta yu di Dios”, ku ta keda kantá pa Deborah Gomez. Ta bon pa nos kada un ban sostené nos mes un artistanan, paso na final di dia ta nan ta nos mes su artistanan.