Hòmber envolví den dòbel asesinato The Alley transportá pa Hulanda

Un sekresia rondó di su transportashon pa Hulanda

532
Hòmber sera pa dòbel asesinato a keda transportá den sekreto pa Hulanda
Willemstad— For di siman outoridatnan a presentá na Prizon SDKK unda a saka e detenido Cristefer Martina bai kuné pa despues a bin tende ku e la wòrdu transportá pa Hulanda.

Tabata siman pasa ku den oranan trempan di mainta outoridatnan den e kaso aki e tim di aresto huntu ku e personal di vigilansha di SDKK esta e Riot Tim a drenta den e sel unda e detenido Cristefer martina alias Cris tabata sera i a sake bai kuné. Tur hende a kere ku por ta pa kualke interogashon ya ku tabatin e informashon ku últimamente e tabata manda vários karta pa Ministerio Públiko. Cris tabata sera den e parti di afzondering esta isolá debí ku e tabatin problema ku diferente detenido den e instituto. Cris a ser kondena na un kastigu di 24 aña pa e kaso di dòbel asesinato ku a tuma lugá den The Alley den Punda dia 3 di sèptèmber na aña 2016 unda dos hóben a keda tira.

Por a komprondé ku a bai Hulanda ku Cris pa un korto periodo ya ku ta esei tabata pone riba e karta ku e la risibí serka Ministerio Públiko. Tin yen vershon ta sirkulá ku e lo mester a deklará den algun kaso ku e ta na altura di dje pero esaki no a keda konfirmá di parti di Ministerio Públiko. Si ku e detenido mes for di tratamentu di su kaso tabata pidi pa e wòrdu sera na Hulanda ya ku e ta sufri di un malesa ya asina e por haña e tratamentu adekuá pa esaki i tambe ku mayoria di su famia tambe mester ta biba na Hulanda.